Tsingolobatita sy tsongon-drenikely (*)

Igagana ny fahakingan’ny FITONDRANA AMBONY AMIN’NY TETEZAMITA (FAT), zary tetezana lavabe tsy mampita mankaiza fa mihodina sy manodikodina tsy lasa lavitra, hatramin’ny nampiharana ny sazy iraisam-pirenena tamin’ny 17 marsa 2010 ; sazy mety mbola hohamafisin’i ACP-UE (Vondrona Afrique, Caraïbes, Pacifique et Union européenne).

Lasa tsingolobatita goavana ny raharaham-pirenena : tsy mandeha amin’ny tongony fa amin’ny tanany ; izany hoe lasa ambany ny lohany (fa tsy mivadika atidoha), ary ny tongony no lasa ambony (fa tsy ny dian-tanany no arahan’ny tongony) ; raha tsorina dia tsy misy zavatra mandeha amin’ny laoniny intsony.

Mifamadika sy mifandipatra ny zava-drehetra : ny voasazy zary lasa mpanasazy ; ny tsy an-dalàna no manao ny lalànany (absence d’Etat de droit) ; ny Fanjakana tsy ara-dalam-panorenana dia miziriziry hamoaka ny lalàm-panorenana vaovao araka ny didy jadona sy fanjakan’olon-tokana (de façon unilatérale) ; tsy misy mpanohintohina, tsy misy mpanohitra, tsy misy mpanara-maso satria tapaka ny fifandraisana amin’ny firenen-kafa, ary foana tsikelikely ny Masoivoho (interdiction d’accréditation). Afaka manao ny nahim-pony sy ny danin’ny kibony ny Fanjakan-tsy zaray (non consensuel), na manao kitandranetaka sy kitanitanina (bricolage institutionnel). Malaza ho nanofana olona manam-pahaizana ara-dalàna sy mpitantana tsara ofana anefa ny Fanjakana Malagasy (grands juristes et administrateurs ; sans oublier des éminents économistes constituant la « CREM »), nefa dia izao no niafarany ; ny gisitra sy ny farahidiny no manao ny Tany sy ny Fanjakana toy « ny tantely afa-drakotra » (« Les cancres mènent la danse ! ») ; raha mba ovaina amin’izay ny mozika é, fa tsy dia ho dridran’Ingilo lalandava ! (tournez le disque chers amis DJ).

Ampahafirin’ny harena miafina any ivelany moa ireo zavatra voakasikin’ny sazy ; tsy ho voakasika na oviana na oviana ny fanan’ireo any ivelany satria misoratra amin’ny anaran’olon-kafa mpiray mihinana (société-écran ou en commandite).

Ny fahazoan-dalana mivoaka dia tsy misy ilany azy, satria teo aloha dia nandà hatrany ny fanasana tany ivelany izy ireo (MAPUTO III, ADDIS-ABEBA de la dernière chance) ; raha mba sendra nivoaka izy ireo dia tsy nahazo nandray fitenena, ka zary lasa « Rafotsibe leom-boanana » ; rahefa te hitsangatsangana any ivelany izy ireo, dia eo ireo fanjakana vahiny mpisolelaka sy mpiray tsikombakomba tsy valahary miara-mandroba aminy ny harem-pirenena, vonona ny handray azy ireo mandrakariva.

Ary marina dia marina tokoa ny voalazany hoe « afaka miaritra amin’ny ananany i Madagasikara sy ny Malagasy… ». Fa iza marina moa ity « Madagasikara » sy « Malagasy » tiana ho lazaina ity ?

Zary fomba fiteny fanalana alahelo koa ny hoe : « Izay mamono biby tsy mahafaty dia hifoteran’ny rambony ! » (« ce qui ne tue pas rend fort ») ; tandremo anefa fa tsy rambony fotsiny io fa misy tandrony !

Fomba fiteny ny hoe « fitandrovana ny tombotsoam-pirenena ambony indrindra ». Dia mbola mampanontany tena ihany koa izany hoe : iza marina moa ity « Firenena » ity ? Tsy hiverenana intsony ny fanararaotan’olom-bitsy manabotry firenena. Raha tena mitsinjo ny tombon-tsoam-pirenena ambony ny FAT dia tokony hanomboka amin’ny fikarakarana haingana ireo voakasiky ny fanafoanana ny AGOA sy ireo tsy an’asa rehetra. Tokony hihaino ny vahoaka ihany koa izy fa tsy ny « vahoabahoaka » famoriny matetika sy ifanaovany dina sy « Teny ifampierana ». Na dia ny mpiray tetika sasany aza dia loa-bava hoe toa « natao tompon-trano mihono » (CENI). Fa iza marina no mitondra ny Tany sy ny Fanjakana ? (« Y a-t-il un vrai pilote dans l’avion ? », Ou sommes-nous en pilotage automatique ? Et télécommandé par qui ? Qui tient vraiment la manette ? Attention l’atterrisage sera forcé ! et le réveil très dur !).

Ny zavatra tena masaka ankehitriny dia ny hoe « izay tsy momba ahy, dia mpanohitra ahy » ; raha tsorina dia izay Malagasy momba ny FAT no tena Malagasy, fa ny sisa dia « FATiFATin’olona sy faikampaikany » ka azo vingavingaina, sy atao tsinontsinona.

Ny Filoha Mpiara-Mitantana (Co-Présidents) sy ny Filohan’ny Andry-m-Pirenena rehetra (Présidents des Institutions) voatendry ara-dalàna sy nankatoavina tamin’ny sonia aza vingavingain’i FAT, ka amin’ny fomba ahoana no hanajany ny vahoaka Malagasy madinika, tsy mandady harona. « Tohatra fiakarana ny vahoaka madinika, ary toy ny fia-pary ka rahefa lany tsiro atsipy ».

« Gisalahy homan-ketsa ny FAT », ka izy indray no avo feo na voasazy aza. Tsy mahalala afa-tsy ny mpiara-mihinana aminy ny FAT ka raha sazina izy dia afaka hanasazy ny mpanohitra : « Raha ho faty aho matesa rahavana » ; vao mainka fa ny mpanohitra ! Ary tsy maninona na dia ho « FATy » daholo aza ny Malagasy rehetra, zary ho mahery fo hitondrana voninkazo rehefa tonga ny « sarintsarim-pahatsiarovana » : ramalala, ramalala, maherifonay arahan-kehy, fa matimaty foana amin’ny tsinontsinona !

Toy ny taizan-dRenikely ny an’i FAT ka izay mihetsika maty tsongo daholo, na lasa irakiraka toy ny botokely : « Taizan-dRenikely, raha tsy maty noana, maty tsongo ». Mahantra, noana, tsy an’asa… ny vahoaka Malagasy ; ka anjaran’ny tsirairay ny mitsara amin’ny maso tsy miangatra.

VERY ZO TANTERAKA NY VAHOAKA MALAGASY

VOAHITSAKIATSAKA NY ZO MAHA OLOMBELONA AZY

MANGETAHETA AMBONY LAKANA EO AMBONY HARENA AMBANIN’NY TANY MIAVOSA

MAHARI-PERY NY VAHOAKA MALAGASY

NEFA TSY TOKONY HO ZARY FAHALEMEN-TSAINA IZANY

HERINTAONA IZAO NO KAMBOTY SY MAHONENA NY MALAGASY

BE FANDEFERANA LOATRA NY VAHOAKA MALAGASY

« NY TSIHY NO FOLA-MANDEFITRA FA NY OLONA TSY MBA FOLA-MANDEFITRA »

Fahendrena lalina dia lalina izany fa tsy tokony « handihizan’ny adala rehetra, na FAT, na HAT, na FIS, na MOUVANCES… VANCES…VASA ! »

Hisy farany ny zava-drehetra na tsara na ratsy. Tsy maintsy hirongatra sy ho tonga saina ny vahoaka madinika, tsy mandady harona : izay BE NO BASY, ary tsy hisy fotony eo anatrehan’izany ny Hery Famoretana sy ny BASY MAROVAVA rehetra (Les fusils finiront par se taire ; on ne bâillonne pas indéfiniment un peuple !) ; hirohotra toy ny RANO VELONA (EAU VIVE=AOVIV) tsy azo tohaina ny vahoaka ka handio sy hifaoka izay rehetra mety manembatsembana azy.

Vahoaka no nitondra an-dRaZafy Albert (1991), mbola vahoaka ihany koa no nitondra an’i Dada Marc (2002), ary mbola « vahoaka antsoiny matetika fa tsy henoiny » no nitondra an’i Andry TGV (2009)…ary mbola vahoka no hiloloha an-DRAHOAVY (OAVIV 201X) toy ny « RANO MAHERY ».

« Ny ririnin-dasa tsy tsaroana fa ny fizotran’ny tantara tsy azo ovaina » (Les dirigeants malgaches sont réputés avoir la mémoire courte : on ne change jamais le cours de l’histoire).

FAMPITANDREMANA FARANY : NY VAHOAKA IHANY NA HO ELA NA HO HAINGANA NO TOMPON’NY TANTARA. RAHEFA HIDITRA AN-TSEHATRA NY VAHOAKA DIA VITA HATREO NY TANTARA. (MENALAMBA, VVS, MDRM… clin d’œil à nos martyrs du 29 mars 1947)

« RANO VELONA, RANO MAHERY, RANO TSY AZO TOHAINA » (AOVIV)

Professeur RABEMAHARO Jacques (TOULOUSE)
Nouvelle force « AOVIV »

(*) Rétorsion et tentation répressive