Miteraka fanafintohinana ho an’ny maro ny mandre fa potehin’ny foko merina hono ny tanindrazana satria ny filoha Ravalo dia merina. Diniho ny tantara vao manenitr’olona, fa saika ny merina hatrany anie no nampandry tany teto vao toy izao isika e. Tsy hidirana lalina ny tany amin’ny andron’ny faha-mpanjaka. Niongana ny filoha Philbert Tsiranana, moa tsy nahatsapa ve isika fa ny Jeneraly Ramanantsoa no nantsoina nandamina ny raharaha teto, izay tsy iza fa merina io olona io ? Niongana i Ratsiraka ny taona 91 mbola i Razanamasy, merina hiringiriny no natao nampandry ny tany teto, dia nilamina ny raharaha. Nitondra indray i Zafy Albert, saingy tratry ny fitsipaham-pitokisan’ny depiote maro an’isa dia iny Ratsirahonana fa nomena sehatra nitondra ny tany sy ny firenena. Koa ankehitriny ve raha Merina I Ravalo dia vohizina fa potehin’ny Merina ny tanindrazana. Raha marina io, aoka ho avahana ny vary amin’ny tsiparifary fa tsy atao safo-bemantsina ny tantara. Ny hita dia efa samy nitondra teto ny foko hafa mpiray tanindrazana, koa nahoana no volena indray ity resaka ity ? Sa ny soa atao loza mihantona ?
Ny soa atao loza mihantona
mercredi 1er août 2007 | 211 visites |