Nomen’ny AKFM tsiny ny filoha

« Tsy nisy olona vonona hanakana io fivoriana io, fa ny fanemorana azy no tokony ho atao ». Io no nambaran’ingahy Erick Rakotomanga, sekretera Jeneralin’ny antoko AKFM. Ny antony, dia mbola miaina ao anatin’ny fahasahiranana i Madagasikara. Gaga ity antoko ity, raha nanambara ny filoha fa nohamafisina ny resaka fandriam-pahalemana, noho ny fiomanana amin’io fivoriana an-tampony aty Afrika amin’ny volana Jolay 2009 io. Mitovy fomba fijery amin’itompokolahy Herizo Razafimahaleo izahay momba ny fomba fijery io fivoriana io. Ny antony dia na ireo trano fandraisam-bahiny sy ny fotodrafitr’asa isan-karazany aza, dia vola be no lany, nefa io fivoriana io fotsiny no hanaovana izany. Toa endrika fisehoana ivelany fotsiny izao mitranga izao hoy ny AKFM ka tsy ho gaga isika raha hisy hiteny fa didy jadona fotsiny no mitranga eto.